DAKIKA 90 ZA KIBABE , YANGA VS MBEYA CITY LEO

Young Africans inaenda kucheza mchezo wa 12 Ligi Kuu msimu huu, wakicheza na wabishi kutoka jiji la Mbeya, Mbeya City FC mchezo unaopigwa katika dimba la Benjamin Mkapa leo hii novemba 26 majira ya saa 12:15 jioini. 

Kwenye mechi 11 walizocheza mpaka sasa katika Ligi Kuu, Young Africans wameshinda mechi 9, sare mbili na hawajapoteza mchezo wowote mpaka.

Mbeya City kwa upande wao wamecheza michezo 13, wakishinda minne, sare saba na kupokea vichapo mara mbili. 

Mchezo wa mwisho wa Ligi, Yanga wametoka kuichapa Dodoma Jiji mabao 2-0 huku Mbeya City wakitoka sare ya bao 1-1 dhidi ya Simba, katika dimba la Sokoine, jijini Mbeya.

Bila shaka utakuwa mchezo mgumu wenye upinzani mkali kwani rekodi zinaonyesha kwenye mechi sita za mwisho, Yanga wameshinda mara moja, sare tano huku Mbeya City wenyewe wakiwa hawajaonja ladha ya ushindi.

Dakika 90 hizi ni ‘vita’ pia ya washambuliaji Fiston Mayele (8) na mkali wa Mbeya City, Sixtus Sabilo (7).

Mayele mpaka sasa amepachika mabao nane, akiwa ni kinara wa mabao kwenye Ligi Kuu mpaka sasa, huku Sabilo akishika nafasi ya pili kwenye orodha hiyo akipachika mabao saba.