KINACHOMNYIMA MAGOLI MAKAMBO CHAWEKWA WAZI

BILA ya kupepesa Macho Kocha Mkuu waYanga, Mtunisia Nasreddine Nabi ameeleza sababu inayopelekea Heritier Makambo kushindwa Kufunga Magoli.

Nyota huyo anayeichezea Yanga nafasi ya Mshambuliaji ameonekana kutokuwa na msimu mzuri kutokana na kushindwa kupata nafasi katika kikosi cha kwanza.

Hadi sasa Makambo hana goli lolote katika ligi kuu ya NBC huku akipata ugumu wa namba kwakuwa Fiston Mayele yuko kwenye Ubora wa hali ya Juu.

Mara baada ya Kumalizika kwa Mchezo wa Ligi kuu ya NBC dhidi ya Kagera Sugar, Nabi alisema ukame wa mabao unamfanya atoke mchezoni, apoteze umakini na kujikuta kukosa nafasi nyingi za wazi za kufunga.

Nabi alisema kuwa mshambuliaji huyo anatakiwa kutuliza akili yake na kupunguza presha anayoipata kutoka kwa mshambuliaji mwenzake Mayele mwenye mabao tisa katika ligi.

“Kisaikolojia Makambo hayupo sawa, hiyo ni kutokana na presha kubwa anayoipata kutoka kwa mshambuliaji mwenzake Mayele aliyekuwa katika kiwango bora hivi sasa.

“Hiyo inaweza kumkuta mchezaji yeyote mwenzake anapofanya vizuri pale anapopata nafasi ya kucheza, Makambo anatakiwa kupunguza presha itakayomfanya acheze kwa kujiamini.

“Siku zote mshambuliaji unapopoteza nafasi za wazi za kufunga, hali ya kujiamini inapungua na kujikuta mchezaji akitumia vibaya nafasi ya kufunga kama ilivyokuwa kwa Makambo ambaye leo (Jumapili) tulipocheza dhidi ya Kagera alishindwa kutumia nafasi zaidi ya moja za wazi za kufunga, hiyo imetokana na presha aliyokuwa nayo hivi sasa anatamani kufunga lakini anashindwa kutokana na kupania,” alisema Nabi na kuongeza kuwa.

“Ninaamini atatulia na kucheza vizuri ikiwemo kufunga mabao mara baada ya kumtengeneza kisaikolojia, kama kocha hilo ndiyo jukumu langu nitajitahidi kumbadilisha na kumuweka sawa”