RAIS MAGUFULI AWAKARIBISHA WAPINZANI KUFANYIA MIKUTANO YAO IKULU

Mwenyekiti wa Chama cha Mapinduzi (CCM), Dkt John Magufuli amekaribisha vyama vyote kufanyia mikutano Ikulu na kudai kuwa Ikulu ni mahali pa Watanzania wote.

Rais Magufuli ambaye ni Mwenyekiti wa chama hicho, ametoa kauli hiyo Jumanne hii wakati akifungua mkutano wa Halmashauri Kuu ya Taifa ya CCM (NEC) kilichofanyika katika ukumbi wa Ikulu jijini Dar es Salaam.

“Nawakaribisha sana hapa Ikulu hapa ni kwenu,” alisema. “Bila ninyi mimi nisingekuwa hapa. Kwahiyo sioni aibu kuwakaribisha wana CCM, lakini pia hapa ni kwa Watanzania wote, na ndio maana kuna wageni kutoka nje wamefika hapa Ikulu, wanamuziki niliwakaribisha Ikulu, wakati wa futari tulifanyia hapa hapa. Kwahiyo sioni ajabu ninyi kuwakaribisha hapa. Halafu kuona watu wajiulize kwanini mikutano wanafanyia Ikulu,” amesema Magufuli.

“Lakini kama kuna vyama vingine vinataka kuja kufanyia hapa mikutano yao waombe na utaratibu wa hapa unajulikana kwamba wakija hapa tujue na agenda zao tuwasikilize na ambayo wanayazungumza. Kwahiyo vyama vyote vinakaribishwa kufanyia mikutano hapa. Kwahiyo ndugu zangu wajumbe nataka kuwahakikishia wala hii haitakuwa mara ya mwisho tutakapoamua hakuna mtu wa kunipangia mkutano nifanyie wapi,” aliongeza.

BY: EMMY MWAIPOPO

************