CUF YAKANUSHA KUHUSIKA NA UCHOCHEZI WA VURUGU ZA MTWARA

 

SIKU chache baada ya Serikali kuahidi kusaka kokote duniani wachochezi wa vurugu za Mtwara, Chama cha Wananchi (CUF) kimeibuka na kudai hakihusiki.

Chama hicho kimedai kupata taarifa ya kuwapo mpango wa kukamata viongozi wa CUF na kuuaminisha umma kuwa ndio wahusika wa kuchochea, kupanga na kufanya vurugu za Mtwara.

Hayo yalielezwa jana na Mwenyekiti wa chama hicho, Profesa Ibrahim Lipumba kupitia taarifa yake kwa vyombo vya habari, akidai Serikali imekuwa ikiwabambikia kesi nzito watu wasio na hatia.

Alidai CUF inafanya siasa kwa kujenga hoja na katika suala la gesi imejenga hoja za kiuchumi na maendeleo na uwajibikaji wa kisiasa kuhusu utekelezaji wa miradi ambayo CCM na serikali yake iliahidi kuitekeleza.

“Viongozi wa CUF hawajachochea vurugu wametumia majukwaa ya mikutano ya hadhara na maandamano ya amani kujenga hoja za kimsingi,” alibainisha.

Alitaka Serikali iache kushikilia hoja kuwa mgogoro huo ni matokeo ya uchochezi wa wanasiasa wachache wanaojitafutia umaarufu.

Akizama zaidi katika hoja zake, alisema kukamata viongozi wa CUF wa wilaya za Mtwara na Lindi na wa kitaifa, hakutamaliza mgogoro wa Serikali na wananchi wa Mtwara ikiwa serikali itaendelea kuwabeza, kuwadharau na kutowasikiliza, badala yake itaongeza chuki dhidi ya Serikali.

Aidha, ametaka Bunge liunde kamati teule ya kuchunguza kwa nini mradi wa kufua umeme megawati 300 umesitishwa na serikali, upembuzi yakinifu wa mradi wa bomba la gesi na mikataba yote inayohusiana na mradi huu.

Kauli ya Profesa Lipumba ambaye kitaaluma ni mchumi, imekuja siku chache baada ya Rais Kikwete kutoa tamko kali, akisema serikali itakamata wanasiasa wanaochochea vurugu Mtwara kwa kisingizio cha kuzuia gesi isitoke mkoani humo.

Kikwete alitoa kauli hiyo Dodoma alipohutubia wananchi wakati wa uzinduzi wa ujenzi wa barabara ya Dodoma-Iringa eneo la Bahiroad. Barabara hiyo ya kilometa 70 ni kutoka Dodoma mpaka Fufu. Asubuhi yake alizindua Iringa-Migori.

Ilikuwa ni siku moja baada ya vurugu kubwa zilizoanzishwa na watu wanaopinga uamuzi wa serikali wa kujenga bomba la gesi kutoka Mtwara kwenda Dar es Salaam, licha ya Serikali mara kadhaa kuelezea umuhimu na faida ya bomba hilo kwa uchumi wa Tanzania kwa ujumla.

Akihutubia, alisema gesi ya Mtwara ni rasilimali ya Taifa na hakuna mtu anayeweza kusema, kwamba ni mali yake, huku akiongeza kuwa madai yanayotolewa na wachochea vurugu kuhusu rasilimali hiyo ya gesi hayakubaliki na hayana nafasi katika Tanzania.